Gikataho nga gihatagan sa House of Representatives si Leyte 1st District Rep. Martin Romualdez og clearance nga mobiyahe paingon sa Singapore, sumala sa iyang abogado.
Sukwahi kini sa naunang pahayag sa Office of the Ombudsman nga wala nila girekomenda ang hangyo sa pagbiyahe ni Romualdez.
Gipasabot ni Ombudsman Jesus Crispin Remulla nga si Romualdez ubos sa Immigration Lookout Bulletin Order samtang nagpadayon ang imbestigasyon sa giingong flood control scandal.
Tungod niini, wala girekomenda ang iyang pagbiya sa nasud ug gipasiugda nga mas angay nga magpabilin siya sa Pilipinas, ilabi na sa iyang medikal nga kondisyon.
Bisan pa niini, giklaro sa abogado ni Romualdez nga si Atty. Ade Fajardo nga dili kini travel ban kondili usa lamang ka koordinasyon sa imigrasyon, ug giinsistir nga ang kongresista gihatagan og travel authority.
Sa usa ka video statement, miingon si Romualdez nga mobiyahe siya paingon sa Singapore gikan Abril 20 hangtod Mayo 4 alang sa follow-up checkup human sa angioplasty, ug mipasalig nga mobalik siya sa Pilipinas ug magpabilin nga available sa iyang katungdanan sa Kongreso.
Samtang, ang Office of the Ombudsman nangayo og precautionary hold departure order batok kaniya kalabot sa imbestigasyon sa giingong ₱56-bilyon nga flood control kickback scheme, diin siya giila nga adunay posibleng risgo sa paglikay ug giingong kalambigitan base sa mga testimonya ug affidavit sa pipila ka mga personalidad, lakip si kanhi Cong. Elizaldy Co ug uban pang mga saksi sa Senate Blue Ribbon Committee hearings.
