DAVAO CITY-Dako ang kalipay ni Police Regional Office – Davao Director Brigadier General Nicolas Torre III sa kalampusan sa ilang misyon sa Kingdom of Jesus Christ (KOJC) compound sa Davao City.
Si Torre niingon nga nahupayan siya nga sa kataposan makatulog na sila human sa kapin sa duha ka semana nga nagpabilin sa compound ang anaa sa 2,000 ka polis.
Matod niya nga nagpasalamat una siya sa mga polis sa Police Regional Office XI, ug motanyag usab og bulak ngadto sa iyang mitaliwan nga amahan nga maoy iyang inspirasyon sa misyon.
Gipasalamatan usab ni Torre ang mga sakop sa KOJC bisan pa man sa tensiyonado ang ilang kapin sa duha ka semana nga operasyon sa compound.
Niadtong panahona, walay basehanan ang mga akusasyon nga ang kapolisan migamit og tear gas ug long-range acoustic devices o LRADs ug giingong nakalapas sa katungod sa mga sakop sa grupo.
Gikataho usab sa kapolisan nga gilabayan sila og mga bato ug gibuboan og baho ug mabahong tubig.
Hinuon, si Torre niingon nga gusto niyang klaruhon nga dili siya supak sa KOJC, apan nagtuman lang sa iyang obligasyon.
“I don’t believe na magkaaway kami ni (that I am enemies with) Atty. Torreon. I would like to believe na (that) we’re just playing our roles. He played his role, I played my role and it turned out well,” pamahayag ni Torre.
Iyang gitugyan kang Interior Secretary Abalos ang pagdetalye sa pagsurender ni Quiboloy.
Hinuon matud pa niya, wala gyud siya magduda nga wala sa compound ang pastor apan nalangan sila tungod sa kadako sa compound ug kinahanglang tun-an ang mga kakuti.
Matod niya nga sakto sila sa nahimutangan ni Quiboloy apan wala na sila magdetalye.
Giangkon ni Torre nga napakyas sila sa pagpangita og entrada sa underground bunker diin nakit-an ang mga heartbeat ug mga timailhan sa kinabuhi hinungdan nga nagkalot sila og underground tunnel sa silong sa Jose Maria College, usa sa mga istruktura sa maong dapit.
