CEBU-Giawhag sa mga otoridad nga sa matag higayon nga adunay mahitabong disgrasya sa kadalanan nga ilang maaktuhan kay manawag dayon sa mga otoridad o sakop sa kapulisan ug isunod na ang pagkuha og mga video.
Mao kini ang panawagan ni PCapt. Christian Fat, ang hepe sa Inayawan Police Station diin matud niini nga dili sayop ang mag-record og video sa mga nahitabo nga disgrasya sa kadalanan apan, mas maayo kung kahibalo sa unsay angay nga unang buhaton.
Kini nunot sa nahitabong pagpangduggab sa 30-anyos nga habal-habal driver sa Brgy. kinasang-an gahapong adlawa diin nahitabo pasado alas 3 sa kadlawn apan, pasado alas 5 na sa buntag nadawat sa kapulisan sa Inayawan ang maong taho.
Giila ang biktima nga si ‘Alfred’ diin anaa na sa luwas nga kahimtang gikan sa naangkon niini nga mga samad-dinunggaban human kini nadali pagdala sa tambalanan.
Basi sa mga nakakita nga ang maong biktima kay naghuwat og booking daplin sa dalan sa dihang kalit naabot ang suspek og nagpicture-picture sa iyang motor.
Hinungdan nga giduol kini sa biktima ang suspek ug nangutana nganong nagkuha kini og picture sa iyang motor ug nisunod dayon ang lalis ug pagpanunggab.
