Giklaro sa negosyante ug TV personality nga si Sam Verzosa nga wala siyay romantikong relasyon sa mga aktres nga sila si Kyline Alcantara ug Faith Da Silva, human sa mga espekulasyon nga mikatap sa social media.
Sa iyang interbyu, direkta nga gitubag ni Sam nga sila si Kyline managhigala lang ug walay ‘something’ nilang duha.
Sumala niya, mag-istoryahanay ug magkita ra sila sa mga event, apan dili sila manag-uyab.
Nangayo usab siya og pasaylo sa aktres sa mga litrato ug post nga mikatap sa social media nga nakahatag og intriga.
Giklaro usab ni Sam nga kini ang parehas nga sitwasyon tali kaniya ug kang Faith Da Silva, kinsa iyang giingon nga iyang dugay nang higala.
Dugang niya nga sila nagkaila sulod sa kapin sa lima ka tuig ug bag-o lang nagkita pag-usab sa usa ka kalihokan. Miingon siya nga iyang gitudloan usab si Faith kaniadto bahin sa pagkab-ot sa mga tumong, ug malipayon siya sa kalampusan sa aktres.
Samtang, nahisgotan usab sa interbyu ang miaging relasyon ni Sam sa aktres nga si Rhian Ramos, kinsa mikumpirma sa ilang panagbuwag niadtong Marso. Sumala ni Ramos, dugay na silang nagbulag sa wala pa mokatap ang mga isyu sa social media.
Nanggawas ang mga espekulasyon human namatikdan sa mga netizens nga giingong nag-unfollow na ang duha sa Instagram sa miaging tuig.
Sa pagkakaron, gipasalig ni Verzosa nga kung mosulod siya og bag-ong relasyon, boluntaryo kining mahibal-an sa publiko.
