CENTRAL VISAYAS-Gisikop sa mga personahe sa National Bureau of Investigation Central Visayas Regional Office (NBI-CEVRO) ang usa ka babaye sa dakbayan sa Talisay.
Giila ang akusado nga si Geraldine Lomongo Tausa, 38-anyos, residente sa Purok Gabon, Barangay Lagtang, dakbayan sa Talisay.
Nipahigayon og operasyon batok sa suspek ang mga operatiba niadtong Lunes sa gabii, Hulyo 15.
Nasikop si Tausa human sa surveillance sa mga awtoridad hinungdan nga giila siya nga online reseller nga si “Natashiwa Anata.”
Ang mga ahente sa NBI-7 nga nagpakaaron-ingnon nga kustomer mi-order og BIR TIN card gikan kang Tausa online ug gironda ang iyang pinuy-anan niadtong Lunes.
Atol sa operasyon, nasakmit nila ang kinatibuk-ang 240 ka peke nga BIR TIN cards ug 250 ka PhilHealth cards gikan sa possession ni Tausa.
Dugang pa, gikompiskar nila ang usa ka laptop, printer, ug cutter, nga gigamit sa paghimo sa mga peke nga kard.
Sa press conference niadtong Huwebes, Hulyo 18, si NBI-7 director Lawyer Renan Augustus Oliva niasoy nga ang operasyon naggumikan sa hangyo sa BIR niadtong Abril 17, 2024.
Gikatahong naalarma ang maong ahensya sa pagkuyanap sa mga mangingilad nga baraha dinhi sa Sugbo human gikatahong dunay indibidwal nga migamit og peke nga BIR TIN card sa ilang buhatan.
Tungod niini, nangayo og tabang ang ahensya sa NBI-7 aron masikop ang mga sad-an.
Gibutyag ni Oliva nga ilang nasuta nga sakop sa organized crime group ang suspek nga dugay nang naglihok sa tibuok nasod.
Dugang pa, nga nakadawat sila og impormasyon nga aduna pay daghang “printer” ug reseller gikan sa sindikato nga naglihok pa hangtod karon.
Ang mga awtoridad nagtuo nga ang pangulo sa kriminal nga grupo nagbase sa gawas sa Sugbo.
Gipasalig ni Oliva nga padayon ang ilang imbestigasyon aron masikop ang ubang indibidwal sama ni Tausa.
Kasamtangang anaa karon sa kustodiya sa NBI-7 headquarters sa dakbayan sa Sugbo ang dinakpan.(NBI-CEVRO)
