Gipaambit ni Senador Imee Marcos ang impormasyon nga iyang nadawat nga sa sunod semana, o ilabi na sa Enero 15, adunay mga senador ug kongresista nga giingong pasakaan og kaso nga adunay kalabotan sa anomaliya sa flood control projects.
Sumala niini adunay mga kaso nga na-draft na batok kang Senador Jinggoy Estrada, Senador Joel Villanueva, ug kanhi Senador Ramon “Bong” Revilla, ingon man pipila ka mga kongresista.
Samtang wala pa siyay nakitang direktang ebidensya batok sa ubang nalambigit nga kasamtangan ug kanhing mga senador, apan matud niini nga giandam pa gihapon sila.
Taliwala niini, nangutana ang senadora nganong ang Senado daw ang target ug kung ang isyu daw nahimong diversion.
Gidugang usab niini nga bungkagon na ang Independent Commission for Infrastructure (ICI) sa Pebrero 1, labi na kay ang pipila sa mga miyembro sa komisyon mi-resign na usab.
