Kusganong gisupak ni Senador Francis “Kiko” Pangilinan ang sugyot ni Senador Robinhood Padilla nga ipaubos sa 10-anyos ang edad sa criminal responsibility sa mga menor de edad nga nalambigit sa linuog nga krimen.
Atol sa plenaryo sa Senado, si Pangilinan niinsister nga ang solusyon sa isyu sa mga menor de edad nga nakalapas sa balaod dili pinaagi sa pag-amendar sa Juvenile Justice and Welfare Act o Republic Act 9344, kon dili pinaagi sa hugot nga pagpatuman niini.
Bisan kon 10-anyos na ang bata ug nakahimo og seryosong krimen sama sa pagpanglugos, ang balaod nag-ingon nga adunay labing menos usa ka tuig nga mandatory nga pagkabilanggo.
Matod niya nga mahimo usab kining lugwayan depende sa desisyon, subay sa kasamtangang probisyon sa balaod.
Busa, matod niya tataw ang balaod sa obligasyon sa gobyerno nga molihok dayon, ug kung dili kini sundon, ang problema naa sa pagpatuman ug dili sa balaod mismo.
Samtang gisuportahan ni Senador Raffy Tulfo ang sugyot ni Padilla.
Gitumbok sa senador ang pipila ka mga kaso nga iyang nadawat sa iyang programa sa radyo diin ang mga menor de edad giingong nalambigit sa nagkadaiyang krimen.
Iyang gitataw nga panahon na nga susihon kon epektibo pa ba ang kasamtangang balaod sa pagsumpo sa pagdaghan sa mga kaso nga naglambigit sa mga batan-on.
Si Senador Erwin Tulfo, kanhi kalihim sa Department of Social Welfare and Development (DSWD), nanawagan nga hatagan og igong pundo ang ahensya aron makatukod og dugang mga pasilidad alang sa mga bata nga supak sa balaod.
Matod ni Tulfo, dakong problema ang kakuwang sa rehabilitation centers ug juvenile facilities sa nasod nga angay motubag sa panginahanglan sa mga menor de edad nga nalambigit sa krimen.
