Gihimakak ni Senador Ronald “Bato” Dela Rosa nga aduna siya’y kasayuran sa giingong reward system sa mga pulis nga kabahin sa Davao drug war template sa war on drugs sa Duterte administration nga gibutyag ni retired police colonel Royina Garma sa House Quad hearing Committee.
Sa usa ka pamahayag, giklaro sa Senador nga wala siyay ideya kalabot sa alegasyon ni Garma nga gihangop sa administrasyong Duterte ang gitawag nga Davao template sa kampanya batok sa ilegal nga drugas.
Dihang gipangutana ang Senador kon gimandoan ba siya ni kanhi Presidente Rodrigo Duterte nga ipatuman ang rewards system sa dihang siya pa ang PNP chief, ang Senador niingon nga walay ingon niini nga direktiba ang kanhi Presidente.
Kahinumduman nga gibutyag ni Garma nga ang mga polis nga makapatay sa mga drug suspect gihatagan og reward sa matag suspek nga ilang mapatay.
Matod niya nga mao usab kini sila ang nagplano sa operations ug operational expenses.
Ingon man nga gipatawag kini siya ni Duterte alang sa pagtukod og task force diin gamiton ang template sa Davao.
Gikompirmar usab niya nga gikan sa P20,000 ngadto sa P1 milyones ang reward nga ihatag sa mga polis nga makapatay sa ilang drug operations.
