Gikuwestiyon ni Senator-judge Joel Villanueva kung giunsa pagkab-ot sa Cale88 Foods Corp. ang P150.76 milyon nga halin niadtong 2024, bisan walay deklaradong empleyado ang kompanya sa General Information Sheet niini sa maong tuig.
Atol sa impeachment trial niadtong Biyernes, Oktubre 9, nahisgotan usab ang lugi sa kompanya nga mikabat sa P6.13 milyon.
Sumala sa BIR witness nga si Atty. Anne Lorraine Garcia-Marquez, nagpakita ang financial statements og gasto sa sweldo ug direct labor, apan walay detalye sa gidaghanon sa mga trabahante.
Gikuwestiyon usab ni Villanueva ang kakulang sa mga invoice, shipping records ug uban pang dokumentong mosuporta sa mga transaksyon sa kompanya sa gawas sa nasud.
Una nang gibutyag sa Anti-Money Laundering Council nga nakadawat ang Cale88 og P319.2 milyon nga inward remittances gikan sa China tali sa 2022 ug 2025.
Gipasiugda ni Villanueva ang panginahanglan nga masuta kung adunay igong trabahante, supplier ug aktuwal nga produksyon nga mosuporta sa gitaho nga halin sa kompanya.
Apan giklaro niya nga wala pa siya mohimo og konklusyon nga peke ang operasyon sa Cale88.
