Ipadayon sa Senate Committee on Women ang pagdungog kalabot sa mga pasangil sa pagpangabuso sa lider sa Kingdom of Jesus Christ (KOJC), Pastor Apollo Quiboloy ngadto sa mga sakop niini, Human sa dul-an tunga sa tuig.
Matod ni Committee Chairperson, Sen. Risa Hontiveros, ipahigayon nila ang hearing karong Oktubre 23, Miyerkules, alas 10 sa buntag.
Dugang ni Hontiveros nga mosuwat sila sa korte aron tugotan si Quiboloy nga makatambong sa hearing sa komite.
Sa pagkakaron, nagtingkagol na sa prisohan si Quiboloy tungod sa mga kasong iyang giatubang nga paglapas sa Special Protection of Children Against Abuse, Exploitation, and Discrimination Act ug kasong Qualified Human Trafficking.
Paambit sa senador nga si Pastor Quiboloy mag-atubang og bag-ong mga biktima sa sunod nga husay.
Giawhag usab sa magbabalaod ang usa sa dugay nang gisaligan nga mga administrador sa KOJC, si Marissa Duenas, nga mosulod sa usa ka kasabutan sa paghangyo sa US ug mokooperar sa imbestigasyon sa Senado.
