Gideklarar ang “severe to extreme” heatwaves sa matag estado ug teritoryo sa Australia gawas sa Queensland.
Diin ang grabeng sunog nakaapekto karon sa pipila ka bahin sa Australia, ingon man ang mga heatwave gilauman usab nga magpadayon sa kadaghanan sa nasud.
Gikatahong makasinati usab ang nasud og taas nga temperatura sa umaabot nga mga adlaw.
Gani, karong adlawa kay modeklarar ang estado sa Victoria og “total fire ban”, nga mopataas sa fire danger rating niini ngadto sa “catastrophic”, ang pinakataas nga lebel.
Hinungdan nga isirado ang anaa sa 450 ka mga tunghaan ug childcare centers.
Niadtong Huwebes, ang mga bombero nanlimbasug sa pagpalong sa daghang mga sunog nga miulbo sa Victoria ug New South Wales, diin daghang mga eroplano nga puno sa tubig ang gipadala aron pagpalong sa dagkong mga sunog duol sa lungsod sa Wodonga.
Ang Melbourne nakasinati sa pinakainit nga adlaw niini sulod sa unom ka tuig kagahapon, nga miabot sa 40.9 degrees Celsius.
Sumala sa usa ka opisyal gikan sa Bureau of Meteorology, ang Biyernes mao ang “tinuod nga kinapungkayan sa heatwave.” Tungod niini, init kaayo nga mga adlaw ang masinati sa halos tanang lugar sa South Australia, Victoria, kadaghanan sa New South Wales ug pipila ka bahin sa Tasmania.
