LILOAN, CEBU-Nagtingkagol sa prisohan ang usa ka babaye human nasakpang nanguha og mga groceries nga mobalor og kapin sa P11 mil gikan sa supermarket sulod sa usa ka mall nga wa moagi sa counter mga niadtong Huwebes, Agosto 24, 2023, sa Barangay Poblacion, lungsod sa Liloan, amihanang Sugbo.
Ang gitumbok nga shoplifter giila nga si Lornet Clarin Gatmaitan, 37, taga Barangay Sigue, dakbayan sa Toledo, samtang ang iyang mga kauban sakay sa Starex van.
Sa imbestigasyon sa Liloan Police Station ubos sa pagdumala ni Police Major Eric Gingoyon, Hepe sa Liloan Police Station, nasayran nga ang suspek namalit sa Gaisano Grand Mall supermarket uban sa iyang mga kauban dihang gibabagan sa mga house detective sa ilang paggawas kay wala makabayad sa mga pinalit ngadto sa cashier.
Nakuha gikan kang Gatmaitan ang mga canned goods nga nagkantidad og P11,53.25.
Sa pagsusi sa CCTV footage sa maong establisemento, nasayran nga makatulo ka higayon nga nibisita si Gatmaitan sa maong supermarket.
Gikataho nga ilang gikuha ang pipila ka mga pagkaon ug gikarga sa van.
