Niabot sa kapin 5,300 ka tawo, lakip na ang mga Pilipino, ang nagpabiling priso sulod sa mga online scam center duol sa utlanan sa Myanmar ug Thailand taliwala sa gihimong kampanya batok sa human trafficking.
Sa sulat nga gipadala ngadto sa kapulisan sa Thailand, gipahayag sa Civil Society Network for Human Trafficking Victim Assistance (CSNHTV) nga daghan sa mga biktima mga langyaw nga natanggong sa mga pasilidad ubos sa pagkontrolar sa usa ka armadong grupo sa Myanmar.
Giingong gikan sa China, Thailand, Malaysia, Brazil, Russia, Kenya, ug Pilipinas ang maong mga biktima.
Sumala sa United Nations, ang mga scam center sa pipila ka dapit sa Southeast Asia nalambigit sa dakong online fraud nga nagkakita og binilyon ka dolyar matag tuig.
Kasagaran sa mga nagtrabaho niini nabiktima sa human trafficking diin gisaaran sila og nindot nga trabaho apan gipugos diay sa pagpang-scam ubos sa mapahimuslanong kahimtang.
Bisan pa man sa operasyon sa Thailand sa miaging tuig nga nakaluwas og 5,000 ka tawo, gibutyag sa CSNHTV nga daghan gihapong scam compounds ang nagpabiling abri hinungdan nga nagpadayon ang krimen nga nag-apektar sa mga biktima sa tibuok kalibotan lakip na sa Amerika ug Europa.
