CEBU CITY-Nadakpan sa mga sakop sa Labangon Police Station ang usa ka lalaki nga kusog manghulga kung mahubog sa Purok Sambag, Barangay Tisa sa dakbayan sa Sugbo.
Giila ang suspetsado nga si Jonas Sistiso, lumulopyo sa naasoy nga lugar kinsang gireklamo sa iyang mga silingan gumikan sa iyang batasan nga kung mahubog, manghulga kini sama sa pagpabuto niini sa usa ka barangay tanod kinsang giingong kontra sa suspek.
Asoy ni Police Major Eraño Regidor nga nakadawat ang ilang buhatan og tawag kabahin sa maong pagpanghulga ug dali kini nilang girespondihan uban sa mga sakop sa Special Weapons and Tactics.
Gani sa ilang gilusad nga operasyon, naabtan nila si Sistiso ug malampuson nga nakuha ang kalibre 38 nga revolver ug usa ka bala nga iyang gigamit sa pagpabuto.
Kasong kalapasan sa Republic Act 10591 o illegal Possession of Firearms ang gihikay nga kaso nga ipasaka batok kang Sistiso.
