Nasikop ang usa ka iladong vlogger nga nagbase sa Tubigon ang human madakpi sa buy-bust nga gipahigayon alas 6:53 sa gabii. Miyerkules, Oktubre 15, 2025, sa Purok 4, Barangay Macaas, Tubigon, Bohol.
Giila ang suspek nga si Mark Angelo Abucejo, nailhan usab nga “Gegel,” 25, residente sa Barangay Macaas.
Nasakmit sa Tubigon Municipal Police Station ang pipila ka sachet sa gituohang shabu nga motimbang og 10 gramos, nga adunay standard drug value nga P68,000.
Matod sa kapulisan sa Tubigon, gi-monitor si Gegel human mitumaw ang iyang pangalan nga may kalambigitan sa ilegal nga kalihokan sa droga, bisan sa iyang pagpadayon sa paghimo og mga vlog.
Atol sa surveillance, nabantayan sa mga otoridad nga usahay mag-promote siya og ilegal nga drugas sa iyang mga video, nga nakakuha usab sa atensyon sa mga netizen.
Si Police Captain Carlo Jobel Lofranco, hepe sa Tubigon Municipal Police Station, niingon nga daghan silag nadawat nga report pinaagi sa ilang Facebook page bahin sa giingong drug-related nga kalihokan sa suspek.
Gumikan niini, gisugdan sa kapolisan ang pag-monitor sa social media account sa suspek ug nasuta nga atol sa iyang live stream, imbitahon niya ang iyang mga followers nga moanha sa iyang balay aron mogamit og shabu.
Dugang pa ni Lofranco nga ang suspek usa lamang ka street-level individual ug dili major dealer, apan ila nang gitumbok nga tinubdan sa ilegal nga drugas.
Human makakuha og drugas gikan sa iyang supplier, gikatahong iya kining iapod-apod sa iyang mga kaila.
Giawhag ni Lofranco ang mga influencer sa social media nga gamiton ang ilang mga plataporma nga responsable, dili sama sa gihimo ni Gegel pinaagi sa pag-awhag sa iyang mga sumusunod sa paggamit sa ilegal nga droga.
Ang mga nakumpiska nga ebidensiya giduso na ngadto sa PNP Forensic Unit sa Bohol Police Provincial Office alang sa chemical analysis.
