CEBU CITY — Dako ug stress ang gidala karun sa mga tinun-an ilabi na ug anaa lang sila sulod sa panimalay sa pila ka buwan sa dihang gipatuman ang lockdown subay sa COVID-19 pandemic.
Gibutyag ni Dr. Anna Oaminal-Watin, usa ka psychologist, nga ang stress mamahimo nga ginagmay, hinayhinay, apan adunay stress usab nga bigtime ang resulta ngadto sa usa ka indibidwal hinungdan nga adunay maghikog.
Matud ni Dr. Watin nga kung lantawon, ang mental health concern, dili sa tanan nga higayon ang makita o ‘visible’, hinungdan nga importante gayud ang pag-giya sa mga ginikanan ilabi na niining panahon sa pandemya.
Gawas pa niini, giingong ang mga batan-on karun ang nakatutok na 24/7 sa ilahang social media, ug kini dako ug impluwensiya sa pangutok, diin daghan na ang makahatag kanila ug negatibo nga panglantaw sa kinabuhi.
Subay niini, tambag sa naasoy nga psychologist, nga imintinar ang positibo ug maayo nga panghunahuna ug kanunay nga huna-hunaon nga adunay paglaum sa unahan.
Gidugang pa ni Dr. Watin nga gikinahanglan usab ang oras sa pamilya diin matag usa paminawon ang tingog, pagkinumustahay, ingon man nga ipabilin ang pagkamalinawon sa palibot ug likayan ang away sulod sa panimalay.
Ang maong pamahayag ni Dr. Watin ang subay usab sa pipila ka mga insidente sa paghikog sa mga tinun-an, gumikan sa giingong kalisod sa ilahang pag-adjust sa gitawag nga ‘blended learning’ subay sa new normal nga sistema sa edukasyon. /SBR
