Nihangyo si Senate President Vicente “Tito” Sotto III kang Presidente Ferdinand Marcos Jr. nga i-certify ang Senate Bill 1215 o ang balaudnon alang sa Independent People’s Commission (IPC) nga dinalian aron mapadali ang pag-aprobar niini.
Matod ni Sotto, gitumong sa maong balaodnon nga himuong permanenteng balaod ang kasamtangang executive order sa Presidente nga nagtukod sa IPC.
Giklaro sa senador nga ang IPC dili lang mag-review sa mga proyekto sa Department of Public Works and Highways (DPWH), kondili lakip na sa mga programa sa ubang ahensya sama sa Department of Agriculture, Department of Health, Department of Education, ug uban pa.
Nasayran nga ang maong balaudnon kay nalatid nga ang IPC mohimo og komprehensibong imbestigasyon sa tanang gikatahong anomaliya sama sa kurapsyon, ghost projects, overpricing, ug paggamit sa substandard nga materyales, mga proyekto sa nasudnong kagamhanan, local government units, ug government-owned corporations.
Hatagan usab ang IPC og gahum sa pag-ila sa mga nalambigit gikan sa publiko o pribadong sektor ug pagrekomendar sa mga kasong kriminal, sibil, o administratibo batok sa mga mapamatud-ang sad-an.
