SOUTH KOREA-Sugdan na karong tuiga sa South Korea ang pagdeploy og drone-melting laser weapons aron gub-on ang mga unmanned aerial vehicle sa North Korea o remote-controlled nga mga drone.
Diin ang bag-ong armas sa laser gitawag og ‘StarWars Project’ nga ‘invisible’ ug ‘noise-free’.
Wala usab kini magkinahanglan og dugang nga mga bala tungod kay naggamit lamang kini og kuryente ug nagkantidad og 2,000 won (US$1.45) matag shot.
Kini nga hinagiban sa militar gimugna sa Hanwha Aerospace ug nakab-ot na niini ang 100% nga shoot-down rate sa nangaging mga pagsulay.
Matod ni Lee Sang-yoon sa South Korean Defense Acquisition Program Administration (DAPA), moagi pa kini og dugang kalamboan sa umaabot nga mga adlaw ug siguradong mahimong ‘game-changer’ sa bahin sa sistema sa armas.
Nasayran nga ang StarWars System makahimo sa pag-neutralize sa usa ka target gamit ang laser light nga namugna gikan sa optical fiber niini.
Gipasigarbo pa sa SoKor nga mahimo kining mogawas ug magamit sa kawanangan tungod kay naggamit kini og elektrisidad, ingon man makadugang kini og output aron mas paspas ang tubag ug maabot pa ang gikusgon sa kahayag.
