Milapas sa P1 trilyon sa 2025 ang Reserve Fund sa Social Security System (SSS) diin kini ang pinakakusog nga financial performanc nga natala sa kasaysayan.
Sumala sa Finance Secretary ug Social Security Commission Chair nga si Frederick D. Go, ang net income sa SSS miabot sa P142.97 bilyon, samtang ang kinatibuk-ang assets misaka ngadto sa P1.26 trilyon.
Matud niini nga kini naghatag og klaro nga mensahe sa mga miyembro nga ang ilang mga pensyon luwas ug ang mga benepisyo nagpadayon, subay sa direktiba ni Presidente Ferdinand Marcos Jr. aron mapalig-on ang mga benepisyo ug pagdumala sa ahensya.
Gipasabot ni SSS President ug CEO Jay de Claro nga kini resulta sa estrikto nga disiplina sa panalapi ug mga reporma sa pagdumala sa pundo.
Sa 2025, ang SSS nagpatuman og tinuig nga pagtaas sa pensyon, nga adunay 10% para sa retirement ug disability, ug 5% para sa survivor pensions hangtod sa 2027.
Ang mga benepisyo nga giapod-apod sa 5.66 milyon nga mga miyembro miabot sa P304.94 bilyon ug ang mga loan mikabat sa P61.11 bilyon. Ang interest rate sa pipila ka mga programa sa pautang gipaubos usab gikan sa 10% ngadto sa 8% ug ang Pension Loan Program para sa mga survivor pensioner gipalapdan.
