Gipasigarbo ni U.S. President Donald Trump ang iyang mga nahimo sulod sa usa ka tuig, ilabina sa ekonomiya ug nasudnong seguridad.
Sumala ni Trump, ang iyang administrasyon nakapakunhod sa core inflation ngadto sa labing ubos nga lebel sulod sa kapin sa lima ka tuig.
Ingon man nga subling nahisgutan niini si kanhi U.S. President Joe Biden, kinsa sumala ni Trump naghatag sa Amerika sa pinakagrabe nga inflation sa kasaysayan sa nasud, sukwahi sa gisulti sa iyang mga kritiko.
Gitumbok usab ni Trump ang pagtubo sa stock market, nga giingong nakatala og 53 ka “all-time record highs” sukad siya midaog isip Presidente.
Dugang niya nga ang iyang administrasyon nakadani og kapin sa $18 trilyon nga mga pamuhunan sa unang tuig sa iyang pamunoan.
Sa isyu sa imigrasyon, wala usab gibaliwala sa Presidente sa Amerika ang mga nahimo sa iyang administrasyon sa pagpugong sa mga ilegal nga imigrante ug ang pagsulod sa ilegal nga fentanyl o usa ka klase sa painkiller sa nasud, nga iyang giingon nga mikunhod og 56% ug nakatala sa labing ubos nga gidaghanon sa mga ilegal nga imigrante sa utlanan sa US-Mexico sa miaging tuig.
Gipasiugda usab ni Trump ang kusog sa puwersa sa militar ug pulisya sa Amerika sa iyang pakigpulong, nga nag-ingon nga kadtong gusto nga mohagit sa nasud nahadlok na karon, nga naggikan sa gituohang pagbalik sa pagtahod sa Estados Unidos.
Isip usa ka iladong fan sa isports ug kanhi tag-iya sa usa ka propesyonal nga team sa football, gidayeg ni Trump ang kalampusan sa team sa hockey sa US nga nakadaog og bulawan sa Winter Olympics.
