Nagpadayon ang panawagan ni Cagayan de Oro Rep. Rufus Rodriguez alang sa permanenteng pagdili sa operasyon sa POGO sa nasod.
Taliwala kini sa kontrobersiya sa POGO sa Bamban, Tarlac ug sa Porac, Pampanga nga bag-o lang gi-raid sa mga awtoridad diin nadiskubrehan ang mga Chinese ug Vietnamese national nga biktima sa mga sindikato sa human smuggling.
Matod niya, nagpamatuod lamang kini nga ang POGO nahimo nang ‘pugad’ sa mga ilegal nga kalihokan sama sa money laundering, illegal immigration, employment, prostitution, extortion, ug kidnapping.
Ingon man nga mas nilapad ang kita sa POGO kaysa sa kita sa gobyerno.
Sa samang higayon, gipasiugda sa magbabalaod nga kinahanglang aprobahan sa Kongreso ang sugyot sa iyang kauban nga si Manila Rep. Bienvenido Abante nga i-ban ang operasyon sa POGO sa nasod.
Gani, daghang mga senador ang misuporta sa maong lakang nunot sa ilang imbestigasyon sa offshore gambling operations sa Tarlac.
