Usa ang patay ug duha ang naangol human nagpabuto ang usa ka sundalo sulod sa 5th Infantry Division Camp Melchor Dela Cruz, Upi, Gamu, Isabela.
Ang suspek giila nga si Sgt. Mark Angelo Ajel, 32, sakop sa Philippine Army nga nadestino sa 503rd Infantry Brigade sa Tabuk City, Kalinga.
Samtang ang mga biktima mao sila si Rolando Amaba, drayber sa van nga taga Brgy. Santa Cruz, Benito Soliven, Isabela; Erlinda Ajel, 35, asawa sa suspek ug vendor; ug Lolita Ramos, ugangan sa suspek, parehong residente sa Yeban Sur, Benito Soliven, Isabela.
Sa nahipos nga impormasyon sa Bombo Radyo Cauayan, nasayran sa imbestigasyon sa Gamu Police Station nga nabati ang buto sa armas gikan sa sulod sa Hyundai Grace van sa mga biktima samtang giparking kini sulod sa kampo.
Sa pagkadungog sa buto, si Sgt. Rommel Narag ug Staff Sgt.Perfecto Prudencio, gikuha dayun ang ilang giisyu nga armas ug giduol ang sakyanan.
Sa ilang paghiduol, ilang nakita ang suspek nga nagbitbit og armas hinungdan nga ilaha dayon kini nga gidakop ug giposasan.
Si Erlinda Ajel daling gidala sa IDGH sa Ilagan City, samtang si Lolita Ramos gidala sa Providers Medical Hospital aron matambalan.
Samtang si Rolando Amaba gideklarar nga dead on the spot sa crime scene.
Ang suspek, uban sa armas nga gigamit, gi-turnover sa Gamu Police Station.
