CEBU-Gikaon sa miulbong dakong sunog ang kalasangan sa kabukirang bahin sa lungsod sa Oslob sa habagatang Sugbo niadtong milabayng adlaw.
Milungtad og pipila ka oras ang sunog ug mikaylap ngadto sa dili mominos 70 ka ektarya nga kasagbotan nga naglangkob sa upat ka barangay sa maong lungsod ug nakaapekto sa hinterland nga mga bahin sa Barangay Poblacion, Cañang, Calumpang, ug Daan Lungsod.
Giingong anaa sa upat ka oras ang pakigkumbati sa mga kabomberohan usa kini nakontrolar.
Samtang, mikabat sa 15 ka mga balay ang naugdaw sa sunog sa usa ka residential area sa Toledo City, kasadpang Sugbo.
Sa pikas bahin, gipaambit ni SFO2 Wendell Villanueva, ang tigpamaba sa Cebu City Fire Station nga padayon ang ilang panawagan sa publiko nga magbinantayon ug magpakabana arun malikayan ang pag-ulbo sa sunog sa dakbayan.
Gihimug-atan usab sa opisyal nga ang pagtak-op sa Fire Prevention Month wala nagpasabot nga humana ang ilang pagpahimangno sa publiko gumikan sa gihapon ug wala’y hunong kini nilang gipanawagan nga mag-amping kanunay.
