(Kuha ni Bombo Lahvi Quiñones)
CEBU CITY – Gibana-banang mukabat sa P1-milyon ka pesos ang danyus sa nahitabung sunog sa Sitio Silangan 2, Barangay Tejero, dakbayan sa Sugbo kagahapung adlawa.
Nakadawat og alarma ang mga kabumberuhan sa alas-4:50 sa hapon ug giisan kini sa 3rd alarm ug nahimo kining “under control” sa oras nga alas-6 sa gabii.
Matud ni Fire Inspector Noel Ababon nga miabot na sa 80 ka mga panimalay nga na-ugdaw samtang 10 ang partially burned.
Nagsugud ang maong sunug sa panimalay ni Preciano Karomayan nga gi-abangan usab ni Joey Bantugan.
Padayun pa usab nga gisuta sa kabomberohan ang hinungdan sa pag-ulbu sa maong sunog.
Subay niini, gibutyag ni Tejero Barangay Kapitan Hermogenes “Boyek” Galang nga posibling ipaubus karung adlawa ang “state of calamity” sa ilahang barangay arun sa pagpagawas ug pondo nga itabang karun sa mga fire victims.
Gipahimutang una ang mga biktima sa barangay gym apan gitataw sa kapitan nga ibalhin unya ang pipila kanila sa eskwelahan arun nga dili usab kini maghu-ut sa gym. Hinu-un, sa pagkakarun, bakasyon man hinungdan nga mamahimu una kini sila nga ipahimutang sa eskwelahan.
Gipanawagan na lang usab ni Galang sa publiko nga tabangan ang iyahang mga konstituwente nga apektado sa sunog pinaagi sa pagpadala ug mga hinabang ilabi na sa mga nag-unang panginahanglanon. (SBR/GN)
