Gitugyan na sa kagamhanan sa lalawigan sa Sugbo ngadto sa pribadong sektor ang pagdumala sa inilang tourism caravan nga ‘Suroy-Suroy Sugbo.’
Kini maoy mahinungdanong lakang nga gipahibalo ni Cebu Governor Pamela Baricuatro atol sa pag-abli sa 11th International Travel Festival (ITF) 2026 niadtong Marso 13.
Ubos niini nga kabag-ohan, ang Cebu Tourism Council (CTC) mao nay mopasa sa renda sa maong programa ngadto sa mga lehitimong tour operators aron mas mapalig-on ang partnership sa industriya sa turismo.
Gilusad usab sa gobernador ang upat sa pito ka thematic tours ubos sa rebranded nga Suroy-Suroy Sugbo, diin lakip niini ang Coastal Journey sa South (Adventure Tour), Highland, Island, and River Journeys, Southern Pilgrimage, ug ang South Countryside Tour.
Tumong sa Kapitolyo nga i-highlight ang mga destinasyon, kultura, ug natural nga mga atraksyon sa Sugbo imbes nga ipasigarbo ang mga personalidad sa luyo sa mga kampanya sa turismo.
Gawas sa pagtugyan sa maong programa, gilatid usab ni Baricuatro ang mga prayoridad sa turismo alang sa tuig 2026.
Naglakip kini sa pagpalapad sa tourism training ug community-based development, pag-digitalize sa mga data ug marketing, ingon man ang pagpalig-on sa presensya sa Sugbo sa international market pinaagi sa trade missions sa Australia ug Japan.
Gisugdan na usab sa Provincial Tourism Office ang virtual mapping sa mga lungsod sama sa Samboan, Ginatilan, Alegria, Tuburan, ug Aloguinsan aron makahatag og 360-degree view sa mga suroyanan online sa dili pa mobisita ang mga turista.
