CEBU CITY-Giangkon na sa gitumbok nga suspetsado nga si Darren Somosot Cui sa pagkamatay ni Charina Relativo niadtong Agosto 2 sa Sitio Laguna, Barangay Bulacao, ning dakbayan sa Sugbo sa kaugalingong boardinghouse niini.
Kasayran nga niadtong Sabado Agosto 3 nadakpan ang suspetsado sa hiniusang opeatiba sa Abellana Police Station ug Inayawan Police Station sa laing kasong giatubang niini sa paghupot og illegal nga armas human siya nasigpatan sa Barangay Sambag 2 ning dakbayan sa Sugbo.
Niasoy si Darren sa kapulisan nga pasado alas 7 sa buntag niadtong Biyernes, adlaw sa insidente, siya misulod sa gipuy-an sa biktima ug sa live-in partner niini nga si Johnjie Enriquez samtang hubog.
Apan, wala diha ang biktima sanglit didto kini sa CR, diin abli ang pultahan og naligo.
Dugang niya nga sa tinguha nga makighilawas sa biktima, iya kining gibira ug giguyod paingon sa iyang giabangan samtang wala sa panimalay ang kaipon niini.
Iyang giangkon nga human niya gigakos ang biktima, kinsa basa ug hubo, nangatumba silang duha sa sawog, ug dihang misuway pagsiyagit ang biktima, gi-ipit niya ang liogan niini gamit ang iyang bukton.
Dugang pa nga human niya gi-secure ang liog sa biktima, nabalaka siya tungod kay wala na kini maglihok ug nagtuo siya nga naluya ra kini.
Human mahibaw-i nga namatay na ang biktima, si Darren niingon nga mikuha siya og butane burner aron sunogon ang balay aron matabunan ang krimen, apan nausab ang iyang hunahuna ug gisunog na lang ang buhok sa biktima.
Niikyas pa kini sa mga lugar sa higala niini sa lungsod sa Liloan ug Consolacion, ug niadtong adlaw sa Sabado mibyahe sa dakbayan sa Lapu-Lapu apan nakadesidir kini nga bisitahon ang ugangan nga lalaki sa Barangay Sambag 2 apan didto na kini natumbok sa mga kapulisan sa dakbayan.
Sa pamahayag ni Police Colonel Antonietto Cañete, ang OIC-Director sa Cebu City Police Office diin giklaro niin nga kasong murder ang ipasaka sa suspetsado nga dugang sa kasong paghupot sa illegal nga armas.
