CEBU CITY-Gipa-deploy ni Talisay City Mayor Samsam Gullas ang pipila ka mga doktor ngadto sa Sitio Sugarland, Brgy. San Roque aron subayon ang kahimtang sa panglawas sa mga residente.
Kini human nga nasayud mismo ang City Government sa problema sa mga residente diin gipangnuka ug adunay samad-samad ang ilang tiil ug paa gumikan sa tubig baha nga walay hubas-hubag ug pirti nang hugawa.
Una na nga nisumbong ang pipila ka mga residente sa Sitio Sugarland sa Bombo Radyo Cebu kabahin sa taas nga lebel sa baha diin buwan kapin na nila kining gi-antus.
Matud ni Mayor Gullas nga tambalan sa mga doktor ang mga nuka-nuka, kagid, ug samad-samad sa paa sa mga residente.
Samtang gisubay na karon sa City Engineering Office ang maong suliran.
Nasayran nga himoong lagoon ang lugar sa may Sitio Sugarland diin suyupon ang baha gamit ang water pump ug madiretso sa drainage system. | SBR
