MANDAUE CITY,CEBU- Opisyal nang gipatuman sa Traffic Enforcement Agency of Mandaue o TEAM ang gitawag nga “Three-Minute Rule”—usa ka pamaagi nga gitumong aron maminusan ang insidente sa pagpang-suhol ug malikayan ang personal nga negosasyon tali sa drayber ug traffic enforcer sulod sa dalan.
Sa interview sa Bombo Radyo, si TEAM Head Hyll Retuya miangkon nga kabahin kini sa mas hugot nga kampanya sa ahensya batok sa suborno ug aron masiguro ang transparency ug integridad sa ilang operasyon.
Ubos sa Three-Minute Rule, gilauman nga sulod lamang sa tulo ka minuto, makompleto na sa enforcer ang proseso sa pagdakop—lakip na ang pagduol sa drayber, pagpasabot sa kalapasan, ug ang pag-isyu sa citation ticket.
Ang tanang interaksyon, klaro nga gimonitor sa mga CCTV camera nga gibutang sa dagkong kalsada, samtang ang mga body-worn camera sa mga enforcer motabang sa real-time monitoring gikan sa TEAM Command Center.
Si Retuya mipasidaan usab nga ang bisan kinsa nga enforcer nga masakpang kalambigit sa suborn o mokompromiso sa proseso—posibleng tangtangon dayon sa serbisyo.
