Gikumpirmar sa Department of Justice nga sugdan na nila ang ilang giplanong technical diving operation sa Taal Lake.
Kini aron pangitaon ang posibleng mga patayng lawas sa mga missing nga sabungero nga giingong gilubong sa nahisgutang bahin sa lanaw.
Matud ni Justice Secretary Jesus Crispin Remulla, magsugod ang naasoy nga diving sa Taal Lake bisan unsa nga adlaw ning semanaha.
Diin pasiugdahan kini sa mga ahensya sa gobyerno, inabagan sa Philippine Navy ug Philippine Coast Guard nga maoy unang nipahibalo sa ilang kaandam sa operasyon.
Hinuon iyang giklaro nga wala kini kalambigitan sa ilang pagpangayo og tabang sa kagamhanan sa Japan alang sa dugang kahimanan.
Gipasabot sa nasangpit nga kalihim nga niadtong miaging semana pa lang gipadala ang maong suwat, busa gipaabot na lang nila nga madawat ang tubag nga ipadala.
Dugang pa ni Justice Secretary Jesus Crispin Remulla nga dili isalikway ang posibilidad nga adunay ubang mga dapit diin gilubong ang mga missing nga sabungero.
Apan bisan pa niini, iyang gipasabot nga lig-on ang ilang impormasyon kon asa ipahigayon ang technical diving operation.
