Mitumaw ang mubo nga tensiyon tali sa mga progresibong grupo ug sa Cebu Provincial Police Office (CPPO) sa gawas sa Cebu Provincial Capitol atol sa usa ka mobilisasyon nga gihimo isip paghandom sa Mendiola Massacre ug pagpahayag sa pagsupak sa Executive Order No. 61 nga nagtukod sa Cebu Provincial Task Force to End Local Communist Armed Conflict (PTF-ELCAC).
Matud sa mga organizers, lakip ang Bayan-Central Visayas, nga malinawong mobilisasyon ang ilang tumong ug nga ang kalihokan nagtumong sa paghinumdom sa mga biktima sa Mendiola Massacre ug sa pagpahayag sa ilang kabalaka mahitungod sa posibleng epekto sa PTF-ELCAC sa katungod sa mga sibilyan.
Sa pikas bahin, gipasabot sa CPPO nga ilang gi-babagan ang kalihokan tungod kay wala kini’y permit ug nakamugna og kahuot sa trapiko sa maong dapit.
Matod ni PCOL Abubakar Udang Mangelen Jr., Provincial Director sa CPPO, ang lakang sa kapulisan nagtumong sa pagsiguro sa kalinaw, kahapsay, ug kaluwasan sa publiko.
Nahitabo ang mubo nga komprontasyon sa dihang gibabagan sa kapulisan ang pagpadulong sa mga nagprotesta paingon sa Capitol grounds.
Wala’y gitaho nga nasamdan o nadakpan atol sa insidente.
Aron malikayan ang dugang tensiyon, gitambagan sa kapulisan ang mga organizers nga ibalhin ang ilang kalihokan sa Plaza Independencia, nga giila isip designated assembly area.
Hinuon, mituman ang mga grupo, ug nagpadayon ang programa nga malinawon sa bag-ong lokasyon.
Gipahayag sa CPPO nga samtang ilang ginahingadlan ang katungod sa kagawasan sa pagpahayag, gikinahanglan usab nga balansehon kini sa pagsunod sa legal nga proseso ug sa kahimtangan sa komunidad.
