CENTRAL VISAYAS-Gipaambit ni Col. Joel Benedict Batara, ang Assistant Chief sa United Command Staff for Civil Military Operations sa Visayas Command ( VisCom) nga nihinay ang mga Communists Terrorist Group ( CTG ) nga nag operate sa Kabisay-an.
Matud niini nga sa Visayas usa na lamang ka guerilla front ang nahabilin og kini naka base sa Panay.
Sumala sa gipresentar nga accomplishment report sa VisCom, mokabat sa 186 ka mga New Peoples Army ( NPA) ang ilang napatay ug 192 ka gamit sa gubat sama sa mga armas ug explosives ang narekober sa mga kasundaluhan.
Ingon man 92 ka mga indibidwal ang mibakwi sa ilang pagsuporta sa NPA nga nakatampo sa pagbuhi sa 19 na ka mga NPA guerilla front.
Mokabat na usab sa 1,401 ka mga miyembro sa NPA ang misurender ug mibalik sa sabakan sa gobyerno ug anaa na usab sa 1,226 ka mga kanhi rebelde ang nakadawat og hinabang ubos sa Enhanced Comprehensive Local Integration Program kon E-CLIP.
Gihimug-atan ni Batara nga dakong tampo sa pagkapuhag sa mga teroristang grupo mao ang pagkahigmata sa katawhan kabahin sa kamatuoran.
Subay niini, ang anti-insurgency nga mga paningkamot sa Armed Forces of the Philippines (AFP) Visayas Command (VISCOMM) nakasentro sa tumong nga matukod ang Stable Internal Peace and Security (SIPS) sa Visayas aron mapalambo ang usa ka inklusibo nga socio-economic development alang sa katawhan.
Diin ang VISCOMM nagpahigayon og nagkalain-laing mga kalihokan aron mapalig-on ang ilang relasyon sa komunidad sama sa pakiglambigit sa mga stakeholders, community support programs, localized peace dialogues, suporta sa national development programs, humanitarian assistance, disaster response, ug peace-building initiatives.
