Naghatag og inspirasyon ang 22-anyos nga si Rolan Popatco Jr. human siya makapasar sa March 2026 Medical Technologist Licensure Examination ug nahimong pinaka-unang Aeta nga lisensyadong medical technologist sa Pampanga.
Gikumpirmar kini sa Provincial Social Welfare and Development Office diin gipa-ambit ang iyang kadaugan nga dili lang alang sa iyang kaugalingon kondi alang usab sa tibook komunidad sa Aeta.
Si Rolan midako sa kabukiran ug naningkamot nga makatungha sa syudad.
Sa tabang sa nagkadaiyang scholarship gikan sa gobyerno, nahuman gayud niya ang kursong Bachelor of Science in Medical Technology.
Gawas niini, nagsilbi usab siya isip SK chairman samtang gipadayon ang iyang pagtoon.
Aminado si Rolan nga miagi siya sa mga pagsulay ug hapit nang misurender apan nahimong inspirasyon niya ang iyang komunidad aron magpadayon.
Pangandoy niyang mahimong doktor aron makahatag og serbisyong medikal sa mga kapareho niyang Aeta sa kabukiran.
Sa kasamtangan, nangeta siya og scholarship aron mapadayon ang iyang pagtoon sa medisina.
