CEBU CITY-“It’s better to give than to receive” – mao kini ang nahimong pamahayag sa unang malampusong blood donor sa ‘bloodiest single-day’ blood donation program sa Bombo Radyo Philippines Inc. ug Bombo Radyo Philippines sa Sugbo.
Dinhi sa Sugbo, diin gipahigayon ang maong kalihukan sa usa ka dakong mall sa dakbayan, daghang mga boluntaryo ang misalmot sa pagdonar sa ilang dugo karung adlawa, Nobyembre 18, 2023.
Usa na niini ang 56 anyos nga si Gil Villacorta kinsa nahimong unang malampusong blood donor sa maong blood-letting activity.
Kalabot niini, nagpasalamat si Villacorta sa Bombo Radyo Cebu sa kahigayonan nga maka-donate og dugo tungod kay makatabang gyud kini sa kadaghanan.
Gawas sa health benefits nga makuha sa pagdonar og dugo, gipasiugda usab ni Villacorta kung unsa ka dako ang matabang pinaagi sa pagdonar og dugo.
Gibutyag usab ni Villacorta nga dili kini ang unang higayon nga nidonar siya og dugo sukad nga nagsugod siya sa pagdonar niadtong 20 anyos pa lang siya.
Sa miaging 36 ka tuig, 23 ka beses na siyang nagdonar ug dugo.
Matud pa niya nga iyang gipahimuslan ang kahigayonan sa pagdonar og dugo samtang lig-on pa ang iyang lawas ug wala siyay sakit tungod kay kung mahitabo kini, dili na siya maka-donate og dugo sama sa iyang naandan.
