CEBU CITY – Nakuha na sa mga kabanay ang upat ka mga senior citizens nga nakabsan sa kinabuhi human nga nabanggaan sa usa pick-up truck sa lungsod sa Jimalalud, Negros Oriental gahapon.
Sa pakighinabi sa Bombo Radyo Cebu kang Police Staff Sergeant Joey Patoc sa Jimalalud Police Station, gikan sa dakbayan sa Dumaguete ang driver sa pick-up truck nga si Robert Lim, 62-anyos ug pauli na unta kini sa Brgy. North Poblacion lungsod sa Jimalalud sa dihang misuway og overtake sa usa ka covered van apan nawad-an kini’g control sa iyang sakyanan ug nibangga sa tindahan nga nahimutangan sa upat ka mga seniors.
“Nisuway kining driver og overtake sa ga-una nga covered van, sa dihang nawad-an kini og kontrol sa sakyanan og nibangga sa sakyanan, ” matud pa ni Patoc.
Diin, igo lang matod pa nga nagkape ang upat ug sa dihang wa damha niini nga ma-angin ug mamatay sa maong disgrasya. Gi-ila sa otoridad ang naasoy nga senior citizens nga silang Milagros Garsula, 82-anyos; Herminigilda Gantalo, 76-anyos; Lydia Garsula, 72-anyos; ug Remedios Fabillar, 65-anyos.
Samtang nalandig sa balay tambalanan ang driver nga si Lim human nisaka matod pa ang blood pressure niini ug naka-angkon usab ug minor injuries
Nipahibalo na usab matod pa ang pamilya ni Lim nga andam kining mo-abagar sa mga gastuhan sa pagpahiluna sa patay’ng lawas sa mga biktima.
Mag-atubang ug kasong reckless imprudence resulting to multiple homicide and damage to poperty ang gihan-ay alang sa driver kung i-pursige sa pamilya sa mga biktima ang pagpasaka ug kaso batok kang Lim.
Samtang gipanubayan na usab sa otoridad ang hinugdan sa pagka-disgrasya ni Lim.// GBS & EKP
