Gipasidan-an sa Estados Unidos ang Oman batok sa bisan unsang lakang sa pagpahamtang og toll o bayad alang sa pag-agi sa Strait of Hormuz, ug miingon nga magpahamtang kini og mga silot sa bisan kinsa nga mokooperar sa maong plano.
Sa usa ka post, miingon si U.S. Treasury Secretary Scott Bessent nga ang ahensya agresibo nga mogukod sa mga indibidwal o grupo nga direkta o dili direkta nga nalambigit sa pagpatuman sa maong toll sa Strait.
Samtang, si U.S. President Donald Trump, nagkanayon nga walay bisan usa ka nasod ang angay nga maghupot sa kontrol sa Strait of Hormuz, nga giila nga usa sa labing importante nga ruta sa petrolyo sa tibuok kalibutan.
Gipasidan-an usab ni Trump ang Oman bahin sa maong isyu, taliwala sa dugay na nga relasyon sa militar ug ekonomiya sa duha ka nasod.
Taliwala niini, ang Oman wala pay opisyal nga pahayag og bisan unsang plano alang sa hiniusang pagkontrol sa Strait of Hormuz uban sa Iran.
Apan, ang Oman miingon nga nakigsabot kini sa Tehran bahin sa kagawasan sa nabigasyon sa maong agianan sa tubig.
Ang Iran nagpahayag na sa ilang pakighiusa sa Oman human sa pagsaway sa giingong hulga gikan sa mga opisyal sa US.
