Nagpagawas ang Estados Unidos, partikular na ang Department of Agriculture Food Safety and Inspection Service (USDA-FSIS), og public health alert sa pipila ka ready-to-eat meat ug poultry products nga ilegal nga gi-import gikan sa Pilipinas.
Matud sa anunsyo nga dili kuwalipikado ang Pilipinas sa pag-eksport sa mga karne ug poultry products ngadto sa US, nga miresulta sa kahadlok kon luwas ba ang maong mga produkto.
Lakip niini nga mga produkto mao ang 150-g., 175-g ug 260-g lata sa “Argentina BRAND CORNED BEEF”; ingon man ang 150-g. lata ug 210-g lata sa “PUREFOODS CORNED BEEF.”
Naglakip usab sa 150-g. lata ug 190- lata sa “CHUNKEE CORNED BEEF.” ug 7.43oz. banga sa “Lady’s Choice Chicken Spread.”
Sumala sa Food Safety and Inspection Service, kini nga mga dili kwalipikado nga mga produkto nadiskubre sa naandan nga mga kalihokan sa pagbantay sa usa ka retailer.
Ang maong mga butang giingong gipadala sa usa ka restaurant ug retail locations sa Connecticut, Delaware, Maryland, New Jersey, New York, North Carolina, Ohio, South Carolina, ug Virginia.
Gisusi sa ahensya kon giunsa pagsulod sa US ang maong mga produkto.
Hinuon, giklaro sa ahensya sa US nga wala’y kompirmadong mga taho kalabot sa dili maayong reaksyon sa pagkonsumo sa maong mga produkto.
