Nanawagan si US President Donald Trump ngadto sa mga nasod nga miyembro sa International Criminal Court (ICC) nga mo-withdraw o mobiya gikan sa maong tribunal.
Gipadayag kini ni Trump atol sa iyang pakigpulong sa ika-81 nga United Nations General Assembly sa New York Martes, Setyembre 22.
Gipasiugda sa presidente sa US nga dili motugot ang Estados Unidos nga imbestigahan o pasakaan og kaso sa ICC ang mga sundalong Amerikano.
Gihulagway usab niya ang ICC isip usa ka institusyon nga “out of control” ug usa ka “evil group of people.”
Kahinumdoman nga dugay na nga kritikal ang administrasyong Trump batok sa ICC.
Niadtong Hulyo, nanawagan usab si US Secretary of State Marco Rubio sa ubang mga nasod nga mobiya gikan sa maong tribunal.
Dili miyembro ang Estados Unidos sa ICC ug wala nag-ratipikar sa Rome Statute, ang kasabotan nga nagsilbing basehan sa pagtukod sa maong korte.
Ang ICC, nga nakabase sa The Hague, Netherlands, adunay mandato nga pasakaan og kaso ang mga indibidwal nga giakusahan sa genocide, mga krimen batok sa katawhan o crimes against humanity, ug mga krimen sa gubat o war crimes.
