Gipahibalo ni 2028 Los Angeles Olympics (LA28) CEO Reynold Hoover nga ang mga atleta, opisyal, ug ilang mga pamilya nga moapil sa 2028 Los Angeles Olympics ”exempted” sa US travel ban.
Kini human gianunsyo ni US President Donald Trump ang bag-ong kamandoan nga nagdili sa mga lungsuranon gikan sa 12 ka mga nasud sa pagsulod sa Estados Unidos isip kabahin sa iyang kampanya batok sa ilegal nga imigrasyon.
Gipasalig sa gobyerno nga adunay “carve-out” o espesyal nga probisyon sa travel ban sa mga partisipante sa Olympic.
Gihimug-atan sa CEO nga ang duwa mahimong “wide-open” o abli sa tanan.
Mipasalig usab si LA28 Chairman Casey Wasserman sa suporta sa administrasyon alang sa Olympics, nga nag-ingon nga wala silay nakita nga epekto sa pagdili sa pagbaligya sa tiket nga magsugod sa sunod tuig.
Gawas pa sa Olympics, ang US, Canada, ug Mexico nakigtambayayong usab sa pag-host sa 2026 FIFA World Cup, diin giingon usab ni Trump nga gusto niya ang hapsay ug kahupayan alang sa mga langyaw nga tumatan-aw.
