Walay nakab-ot nga kasabutan tali sa Estados Unidos ug Iran human sa kapin 21 ka oras nga negosasyon sa Islamabad, Pakistan, matod ni US Vice President JD Vance.
Anaa karon sa Islamabad si Vance alang sa serye sa talks bahin sa pagpalawig sa kasamtangang ceasefire tali sa duha ka nasod.
Sa iyang pahayag, giingon niya nga adunay “substantive discussions” tali sa US ug Iran, apan nagpabilin nga walay pormal nga kasabutan nga naabot human sa taas nga miting nga milungtad gikan Abril 11 hangtod Abril 12, 2026.
Gitambongan ang negosasyon sa mga opisyal gikan sa Estados Unidos, Iran, ug Pakistan, kauban sa delegasyon nga si US special envoy Steve Witkoff ug si Jared Kushner.
Ang diskusyon nag-focus sa pagpalawig sa ceasefire ubos sa Operation Epic Fury, ug sa mga sensitibong isyu sama sa uranium enrichment program sa Iran, seguridad sa Strait of Hormuz, ug mga kondisyon alang sa mas lig-on nga hunong-buto.
Bisan pa sa pagkapakyas sa kasabutan, nagpabilin nga bukas ang posibilidad sa laing hugna sa negosasyon sa umaabot nga mga semana.
