CEBU – Gikumpirmar ni Mabolo Police Station Chief PMaj Francis “Renz” Talosig nga dali nilang girespondehan ang usa ka report nga panagtapok sa mga tawo sa usa ka bar nga nahimutang sa 88th Avenue, Brgy. Kasambagan dakbayan sa Sugbo diin nalapas matod pa niini ang kasamtangang health protocols batok sa coronavirus.
Matod pa ni Major Talosig nga girason sa tag-iya sa bar nga gumikan sa pagbundak sa kusog nga uwan nagtapok ang mga customer ug nawala ang social distancing.
Subay niini, gihuwat na lang usab sa mga operatiba ang desisyon sa hingtungdang ahensiya sa dakbayan human nga gi-isyuhan na ug show-cause order sa Cebu City Business Permit and Licensing Office (BPLO) ang management sa maong negosyo aron motubag sa maong insidente nga nahitabo niadtong adlaw’ng Sabado.
Samtang gihangyo ni Talosig ang publiko nga dili ibaliwala ug pabilin nga hinumduman ang pagtuman sa mga health protocols ning panahon nga nagpabilin ang hulga sa coronavirus.
Nasayran usab nga kini na ang ika-duhang insidente nga adunay nahitabong panagtapok sa business establishments sa area of responsibility sa Mabolo Police.
