CEBU CITY – Gipusil-patay sa usa ka Deputy Chief sa Talisay City PNP ang gituohan nga iyang karelasyon dayun nikutlo usab kini sa iyang kaugalingon nga kinabuhi sulod sa Police Community Precint, sa Brgy. Bulacao, Talisay City kaganihang buntag.
Matud pa ni City of Talisay Police Office nga si Chief Police Major Gerard Ace Pelare nga exclusibong nahinabi sa Bombo News Team nga nahitabo ang insidente sa alas diyes sa buntag. Giila niini ang nagpakamatay nga pulis nga si PLt. Praxilo Albiso ug ang gituohang karelasyon niini nga si Vernice Cardino.
Asoy pa sa mga nakasaksi nga daling gidala ang duha sa tambalanan sa mga niresponde nga pulis nga anaa lang sa 2nd floor apan, gideklara kini nga death on arrival. Adunay samad pinusilan sa ulo si Albiso hinungdan sa daling kamatayun niini.
Nagkatag ang dugo sa salod sa usa ka kwarto sulod sa presinto kung diin gipugos og guba sa mga pulis ang pultahan human nga naka-lock kini sa sulod.
Asoy ni Major Pelare nga sa wala pa ang insidente kay niduol ang Deputy Chief kaniya ug nagpatambag mahitungod sa mga personal nga problema niini.
Sapagkakaron, nipadagan pa og imbestigasyon si Pelare arun nga makuha ang motibo sa pagpatay ni Albiso kang Cardino ug pagkutlo niini sa kinabuhi. Makig-alayun usab ang kapulisan sa asawa ug pamilya ni Lt. Albiso alang sa dugang pang impormasyon.
Gihulagway ni Maj. Pelare nga usa ka aktibo nga opisyal ilabi na sa Anti-Drug Campaign ug COVID-19 Contact Tracing Team sa syudad kung diin daku kini og natabang sa pagpakunhod sa COVID-19 sa syudad.// EKP
