Gisaysay sa PAGASA Visayas Regional Service Division nga ang nasinating pag-uwan-uwan sa Sugbo ug ubang bahin sa Kabisay-an kay tungod sa epekto sa Shear Line o ang panagsangka sa init ug bugnaw nga hangin nga gikan sa sidlakang direksyon.
Kini maoy gipasabot ni PAGASA Visayas Chief Engr. Alfredo Quiblat Jr. atol sa eksklusibong pakighinabi sa Bombo Radyo Cebu News Team niadtong Martes sa hapon, Pebrero 3, 2026.
Matod pa niini nga ang pag-uwan kay mao pa ang direktang epekto sa Shear Line diin sa mga nakalabayng mga adlaw kay nakasinati kini og light to moderate continuous rain ang mga dapit sa Kabisay-an.
Gani karon ang ginamonitor nila mao ang napormang Tropical Depression nga magsabak sa pangalang “BASYANG” isip ikaduhang bagyo nga misulod sa Pilipinas karong tuig 2026.
Asoy niini nga hinay ang dagan sa maong bagyo sa direksyong Northwestward diin niadtong Martes sa alas 5:30 sa kahapunon gideklarar sa PAGASA nga nakasulod na kini sa Philippine Area of Responsibility (PAR).
Sa pagkakaron, adunay duha ka modelo ang gipanglantawan ang PAGASA sa lihok sa Tropical Depression BASYANG diin ang una kay mu-landfall kini inig Biyernes (Pebrero 6) sa CARAGA padulong sa Northern Mindanao hangtod sa isla sa Bohol ug Sugbo pagawas sa Zamboanga Peninsula ug Palawan. Samtang ang ikaduhang modelo kay muigo gihapon sa CARAGA padulong sa Northeastern Mindanao papidpid sa Leyte ug Samar hangtod na sa Southern Luzon.
Gikabutyag niini nga sa duha ka modelo nga ilang gitun-an, makapaabot gihapon ang Central Visayas ug Negros Island Region og mga pag-uwan sugod sa adlawng Huwebes hangtod sa Biyernes.
