CEBU CITY– ‘Prank’ kun pagpanghadlok lamang ang tuyo ni Kevin Ebo kinsang nagbutyag og mga sayop nga impormasyon nga matud pa dunay 7 ka tao nga namatay sa Sugbo gumikan sa COVID-19.
Kini ang pahayag sa netizen nga maoy nagpaluyo sa mi-leak nga group chat kansang miabot na sa buhatan sa Cebu City Mayor ug sa gobernadora sa Sugbo.
Mi-isplikar si Ebo nga ang iyang intensyon mao ang ‘prevention’ nga ang mga tao matud pa dili na mugawas sa ilang balay, ug aron nga mahadlok kini nga dili na maglaag aron makalikay sa virus.
Gi-angkon ni Ebo nga sayod siya nga sayop ug walay kamatooran ang iyang gipakatap nga impormasyon sa maong ‘group chat’ hinungdan usab nga mi-surender ug nagpakita kini sa buhatan ni Cebu City Mayor Edgardo Labella.
Mipahimangno usab ang kadagkuan sa Cebu City Government sa publiko nga taliwa sa general community quarantine, likayan ang pagpakatap og fake news sanglit seryoso sila nga mupahamtang og silot sa kung kinsa man ang masakpan.
