Gikumpirmar ni Presidential Communications Undersecretary Claire Castro nga giaprobahan na sa Office of the President ang reschedule nga mga biyahe ni Bise Presidente Sara Duterte sugod gahapong adlawa, Mayo 2 ngadto na sa Mayo 15.
Si Duterte kaniadto nagsumite og plano sa pagbiyahe nga naglangkob sa daghang mga destinasyon sa Europa ug Asya.
Diin ang iyang orihinal nga itinerary naglakip sa mga pagbisita sa Netherlands, South Korea, Belgium, Germany ug United Kingdom gikan Abril 23 hangtod Mayo 15.
Apan, ang iyang schedule gi-adjust sa ulahi human sa giingong “last-minute” nga pag-isyu sa OP sa foreign travel authority, nga gihimakak sa Malacañang, nga nag-ingon nga ang pag-isyu nagsunod sa mga sumbanan nga pamaagi.
Gidugang usab ni Castro nga wala siyay kasayuran sa eksaktong petsa kung kanus-a giaprobahan sa OP ang pinakabag-ong hangyo ni Duterte alang sa re-schedule nga travel authority.
Basi sa miaging awtorisasyon sa OP, gitugotan si Duterte nga mobiyahe “samtang nag-leave of absence, nga walay gasto sa gobyerno.”
