Gihimakak ni Vice President Sara Duterte nga kaila siya kang Rodulfo Gracioso Jr., usa ka dismissed policeman ug kanhi sakop sa security detail ni kanhi Speaker Lord Allan Velasco.
Hugot usab niyang gipahayag nga wala siya makadawat og bisan unsang kwarta gikan niini.
Sa usa ka pahayag karong adlawa, Setyembre 26, nagkanayon ang Bise Presidente nga nagpaabot ang iyang mga abogado sa opisyal nga kopya sa sinumpaang pahayag (sworn statement) ni Gracioso gikan sa National Bureau of Investigation (NBI) sa dili pa nila sugdan ang mga legal nga lakang nga ilang plano nilang ipasaka batok kaniya.
Una nang mibarog si Gracioso ug nangangkon nga naghatod siya og mga maleta nga adunay sulod nga kwarta ngadto kang VP Duterte, kanhi Presidente Rodrigo Duterte, ug kang Davao City First District Representative Paolo Duterte.
Matod niya, naghatod siya og kapin sa P2 bilyones ngadto kang Bise Presidente Duterte sa kapin 20 ka managlahing higayon.
Gisalikway ni Duterte ang mga alegasyon isip usa ka “media stunt” ug miinsistir nga kabahin kini sa pagsulay sa pagbuhi sa kasong impeachment batok kaniya.
Gipasabot usab sa Bise Presidente nga mangandam ang iyang kampo sa pagpasaka og mga tukmang kaso sa higayon nga makuha na nila ang opisyal nga kopya sa affidavit gikan sa NBI.
