CEBU CITY – Gipahibalo ni Charmaine Rodriguez-Kara, ang tigpamaba sa Metropolitan Cebu Water District (MCWD), nga misaka ang water level sa Jaclupan dam human sa pila ka adlaw nga pag-uwan nga epekto sa Bagyong Tisoy.
Matud ni Kara nga gikan sa 23,000 cubic meter nga supply kada adlaw, misaka kini ngadto na sa 27,000 cubic meter kada adlaw.
Apan giklaro niini nga wala gihapon kini makaabot sa gikinahanglan nga supply nga 33,000 cubic meter kada adlaw.
Sigon pa nga kung magpadayon lang ang kasamtangan nga level sa tubig sa nahisgutang dam hayan mas mu maayo pa ang water supply niining kasamtangan nga buwan.
Subay niini, mipahimangno si Kara sa mga kunsomidor nga ipadayon ang pagkonserbar ug tubig ilabi na sa kasamtangan nga sitwasyon nga 50% lang sa uwan ang nasulod sa mga water facilities.
Nagkanayon si Kara nga lauman ang pagsaka sa demand sa tubig ilabi na karung holiday season.
