Human sa upat ka tuig nga pagtago-tago, si Julie “Totoy/Dondon” Patidongan, ang whistleblower sa kaso sa 34 ka missing nga mga sabungero, nidangop sa pagpasaka og reklamo batok sa 12 ka mga pulis nga giingong nalambigit sa pagdagit ug pagpatay sa mga biktima.
Sa affidavit complaint nga gisang-at sa Napolcom, Lunes, Hulyo 14, si Patidongan niingon nga ang tinuod nga gidaghanon sa mga missing mahimong mosobra pa sa 100.
Atol sa press conference, gipahayag nga ang mga sabungero giingong gidala sa usa ka umahan duol sa Taal Lake nga giingong giabangan sa usa sa mga pulis sa wala pa gipatay ug ang ilang mga lawas gilabay sa linaw gikan sa 2021 hangtod 2022.
Ingon man nga wala na makapugong si Patidongan sa paghilak sa dihang gipangutana nganong karon lang siya mitunga.
Bisan og wala niya gitumbok kon kinsay nanghulga sa iyang pamilya, direkta niyang gilambigit ang negusyante nga si Charlie “Atong” kinsa giingong utok sa krimen, ug niingon nga iyang gimando ang pagpatay sa mga sabungerong gidudahang nanglimbong o nagma-match fixing.
Apan, hugot nga gihimakak ni Ang ang mga alegasyon ug gipasakaan usab og kaso si Patidongan, lakip na ang pagpanulis, grave threat, ug defamation.
Ang Philippine Coast Guard nagpadayon sa pagpahigayon sa search operations sa Taal Lake, diin lima ka sako sa nasunog nga mga bukog sa tawo ug mananap ang nakuha sa ilawom sa tubig.
Matod sa Napolcom, gipaabot nga mopagawas sila og resolusyon sulod sa 60 ka adlaw kalabot sa mga reklamo nga gipasaka ni Patidongan.
