Dili mutugot si Ukrainian President Volodymyr Zelensky nga mu-surrender og teritoryo ang Ukraine pipila ka oras human ang Estados Unidos ug Russia nagkasabot nga magtagbo sa usa ka summit aron hingpit nang hunungon ang gyera sa sidlakang Europa niadtong Sabado, Agosto 9.
Gikatakdang magtagbo sila si Russian President Vladimir Putin ug US President Donald Trump sa Alaska sa umaabot Agosto 15 aron i-resolbar ang tulo-ka tuig nang gubat bisan paman sa pipila ka pasidaan sa Ukraine ug ubang kanasuran sa Europa nga dapat maapil ang Ukraine sa maong kasabutan.
Sa anunsyo pa ni Trump, matod niin nga adunay posibleng pagbayloay og teritoryo apan wala pa kini’y konkretong detalye.
Gihimug-atan hinuon ni Zelensky nga silang mga Ukrainian kay dili mu-surrender og teritoryo sa mga Ruso.
Dugang pa niya nga kung adunay kasabutan nga wala sila’y apil kay kasabutan kini batok sa tiunay nga kalinaw nga walay makab-ot kun di ang pagkawala sa ilang nasud.
Tulo ka hugna na sa negosasyon tali sa Russia ug Ukraine karong tuiga ang napakyas nga mamunga, ug kini nagpabilin nga dili klaro kung ang usa ka summit makapaduol sa kalinaw.
Napulo ka libong mga tawo ang napatay sukad nga gilunsad sa Russia ang full-scale invasion sa Ukraine kaniadtong Pebrero 2022, nga minilyon ang napugos sa pagbakwit sa ilang mga panimalay.
Gisukol ni Putin ang daghang mga panawagan gikan sa Estados Unidos, Europe ug Kyiv alang sa usa ka ceasefire.
Ang lider sa Ukraine nagduso sa paghimo niini nga usa ka three-way summit ug sa kanunay miingon nga ang pagpakigkita kang Putin mao lamang ang paagi sa pag-uswag ngadto sa kalinaw.
