CEBU CITY- Nasakmit ang gibanabanang usa ka kilo sa gidudahang shabu nga nagkantidad og ₱6.8 milyon sa usa ka buy-bust operation nga gihimo sa Barangay Mabolo, Cebu City, sayo sa buntag niadtong Hunyo 27.
Ang operasyon gipahigayon sa Cebu City Police Office (CCPO), pinaagi sa Mabolo Drug Enforcement Unit, sa pakig-alayon sa Philippine Drug Enforcement Agency (PDEA) Region 7.
Nasikop sa maong operasyon ang usa ka suspetsado nga giila sa kapolisan isip High-Value Individual (HVI).
Gikatahong nakumpiskar usab gikan kaniya ang gibanabanang 1,000 gramos sa gidudahang shabu nga adunay standard drug price nga ₱6.8 milyon.
Ang suspetsado nag-atubang og kasong paglapas sa Sections 5 ug 11, Article II sa Republic Act No. 9165 o ang Comprehensive Dangerous Drugs Act of 2002.
Sa pagkakaron, ang dinakpan temporaryong gitangong sa custodial facility sa Mabolo Police Station 4 samtang giandam sa mga awtoridad ang pagpasaka sa tukmang mga kasong kriminal batok kaniya.
Sumala sa CCPO, kabahin ang maong operasyon sa padayong kampanya batok sa ilegal nga druga pinaagi sa intelligence-driven operations ug koordinasyon sa PDEA aron mapugngan ang drug trafficking sa siyudad.
