ARGAO, CEBU-Patay ang usa ka lalaki human nakigpinusilay sa kapulisan sa bukirang barangay sa Jampang sa Argao, Sugbo, mga alas 5 sa kaadlawon Martes, Agosto 20.
Sa pakighinabi sa Bombo Newsteam kang Police Major Janus Giangan, ang hepe sa Argao Police Station, gitino niini nga nga nisukol ang mga suspetsado sa ilang pag-abot sa lugar.
Hinungdan nga namatay ang usa kanila nga giilang si Jay Rodel delos Reyes Comaling, ulitawo, residente sa nahisgutang lugar.
Napalgan duol sa iyang lawas ang usa ka KG9 submachine gun.
Samtang wala madakpi ang iyang mga ig-agaw nga giilang sila si Jonathan ug Joel Comaling.
Gidugang pa ni Major Giangan, nga miadto sila sa Jampang aron i-serve ang warrant of arrest nga giisyu ni Judge Francis Rainier Navarette sa Regional Trial Court branch 63, Argao batok kang Jonathan tungod sa kasong illegal possession of firearm.
Apan, si Jonathan ug iyang mga ig-agaw, apil ang nagmotorsiklo nga si Jay Rodel, nakigpinusilay sa mga polis, kinsa mibawos og pusil ug naigo patay si Jay Rodel.
Human sa insidente, nakadawat og tawag ang Argao Municipal Police Station nga adunay nakit-an nga hand grenade sa crime scene.
Nakuha sa mga personahe sa Explosive Ordnance Division ang wala pa mobuto nga hand grenade.
Nagtuo ang kapolisan nga ang granada maoy gilabay sa akusado, apan wala kini mobuto.
